Ministria e Infrastrukturës ka fshehur dosjen e pesë kontratave për projekte të realizuara në vitin 2016, të cilat kapin vlerën e afro 2 milionë eurove.
Mosofrimi i informatave të plota për këto kontrata është evidencuar nga Zyra Kombëtare e Auditorit në raportin e fundit të publikuar këto ditë, shkruan sot Koha Ditore.
Kjo, si dhe dhënia e tenderëve kompanive të papërgjegjshme, ngarkimi i buxhetit përtej kapaciteteve të ministrisë dhe punësimet në kundërshtim me ligjin, janë vetëm disa nga shumë shkelje që ZKA-ja ka gjetur në auditimin e pasqyrave financiare të Ministrisë së Infrastrukturës.
Parregullsitë në këtë ministri, sipas ZKA-së, nisin qysh nga planifikimi i prokurimit.
Kjo zyre ka gjetur edhe raste kur kontrata u është dhënë operatorëve që nuk i kanë plotësuar të gjitha kërkesat e dosjes së tenderit.
ZKA-ja liston pesë dosje të pakompletuara, për të cilat ministria e udhëhequr nga Lutfi Zharku i LDK-së nuk ka ofruar dëshmi të kërkuara nga auditori. (Artikullin e plotë mund ta lexoni në numrin e sotëm të Kohës Ditore)
