Ministrja spanjolle për të Drejtat Sociale dhe njëherit liderja e partisë Podemos, Ione Belarra, ka komentuar konfliktin midis Izraelit dhe Hamasit.
“Netanyahu, në krye të shtetit të Izraelit, është krejtësisht jashtë kontrollit. Ai e shpalli OKB-në të padëshirueshme. Është e rëndësishme që komuniteti ndërkombëtar të ndalojë së përkëdheluri dhe ta kundërshtojë atë. E përsëris: sanksione ekonomike dhe një embargo armësh”, ajo shkroi në X.
Ajo më pas publikoi një video në të cilën sugjeron “katër gjëra që vendet evropiane mund të bëjnë sot për të ndaluar gjenocidin në Palestinë”.
“Sot mësuam se Netanyahu i ka shpallur Kombet e Bashkuara të padëshiruara në Izrael. Kjo do të thotë se stafi i OKB-së nuk do të ketë viza për të udhëtuar në atë zonë”, tha ajo.
