Shefja e diplomacisë evropiane, Federika Mogherini, është shprehur se unioni është i shqetësuar për rritjen e fjalimeve nacionaliste në Ballkan.
Nga ana tjetër Mogherini ka thënë se Ballkani është një rajon kyç i Evropës dhe për këtë shkak duhet të forcohet perspektiva për integrimin në Bashkimin Evropian.
“Ballkani Perëndimor është rajon kyç i BE-së kryesisht për shkak të sigurisë, parandalimin e radikalizmit, një vend ku kemi bashkëpunim të mirë, për shkak të menaxhimit të refugjatëve dhe kufijve”, është shprehur Mogherini, e cila ka shtuar se vendet e Ballkanit Perëndimor janë vende të Evropës.
Ndërkohë vet shefja e diplomacisë evropiane ka zbuluar se tema e darkës me kryeministrat e Ballkanit ishte integrimi i vendeve të tyre në BE.
“Unë shpesh them se nuk duhet të bisedojmë për perspektivën e këtyre vendeve për hyrje në Evropë, për shkak se këta vende janë në Evropë. Duhet të bisedojmë për perspektivën e integrimit të tyre në BE dhe pikërisht kjo është tema e darkës”, tha ajo.
