Momenti tronditës/ Vrasësi i diplomatëve izraelitë priti mes dëshmitarëve dhe shpërtheu në thirrje: Liri për Palestinën, e bëra për Gazën…

BILD

Dy punonjës të ambasadës izraelite në Uashington u vranë të mërkurën mbrëma rreth orës 21:00 sipas orës lokale, pas disa të shtënash pranë Muzeut të Hebrenjve. Këtë e njoftoi shefja e policisë së kryeqytetit amerikan, Pamela Smith. Një i dyshuar (30 vjeç) u arrestua.

 Shefja e policisë, Pamela Smith, tha: “Përpara të shtënave u vërejt një i dyshuar që po shkonte para muzeut. Më pas ai ka hapur zjarr ndaj një grupi prej katër personash dhe ka vrarë një burrë dhe një grua. I dyshuari ka bërtitur ‘Liri, liri për Palestinën’.”

Sipas Smith, i dyshuari është Elias Rodriguez, një burrë 30-vjeçar nga Chicago.

Ai nuk ka pasur shokë dhe ka vepruar vetëm.

Siç raporton ‘CNN’, atentatori u hoq si dëshmitar okular në vendin e ngjarjes dhe ka pritur mbi dhjetë minuta për mbërritjen e policisë. Këtë e ka raportuar kanali i lajmeve duke iu referuar një dëshmitareje okulare.

Sipas dëshmitares, ai ka vepruar në mënyrë ‘të paparashikueshme’ kur ka mbërritur policia dhe më pas u ka thënë oficerëve: ‘E bëra, e bëra për Gazën. Liri për Palestinën!’

Një dëshmitare tjetër tha se, pas ngjarjes, burri dukej i çoroditur dhe i shqetësuar, ka murmuritur për vete dhe ka kërkuar nga kalimtarët që të thërrasin policinë.

Tragjike: Burri, i cili u qëllua së bashku me të dashurën e tij, i kishte blerë asaj një unazë javën e kaluar për t’i propozuar për martesë javën tjetër në Jerusalem.