Gjashtë vjet pas ndërtimit të objektit të morgut në lagjen “Arbëria” në Prishtinë, ai mbetet i pashfrytëzuar, ndonëse ndërtimi i tij është bërë me qëllim të kryerjes së ceremonive të varrimit.
Objekti nuk është funksionalizuar kurrë që nga ndërtimi i tij, teksa kostoja e ndërtimit të tij kap vlerën e gjysmë milioni eurosh, i financuar nga buxheti i Komunës së Prishtinës.
Zyrtarë të Komunës së Prishtinës dhe ata të Ndërmarrjes “Hortikultura” kanë drejtuar akuza reciproke në lidhje me mosfunksionalizimin e këtij objekti.
Të parët thonë se objekti ka mbetur peng për shkak të mosmirëmbajtjes nga ana e “Hortikulturës”, kurse drejtues të kësaj të fundit pohojnë se Komuna nuk është interesuar kurrë për këtë objekt, sepse ata janë përgjegjës për investimet dhe mirëmbajtjen e tij.
Aktualisht, në këtë objekt shfrytëzohet si zyre, një dhomë e vogël, nga disa punëtorë të Ndërmarrjes “Hortikultura” dhe atë pasi që vetë e kanë rehabilituar për ta bërë të shfrytëzueshme.
Në ditën e përurimit të tij, në nëntor të vitit 2012, ish-kryetari i Komunës, Isa Mustafa, kishte thënë se objekti do t’ua lehtësojë qytetarëve shërbimet e ceremonive të varrimit, dhe se ky ka qenë edhe qëllimi i ndërtimit të tij.
Objekti si i tërë ka 800 metra katrorë, dhe aty ka qenë i paraparë që të jenë dy salla për ngushëllime, si dhe dy banjë për shërbime funerale.
