Prestigjiozja “The Guardian” në shkrimin “U mahnita nga bukuria”, rendit Muzeun Kombëtar të Fotografisë Marubi në Shkodër, në listën e muzeve dhe galerive më mbresëlënëse të Evropës. Lajmin e ndau kryeministri Edi Rama në Facebook.
Ndër të tjera britanikja “The Guardian” shkruan se Muzeu Kombëtar i Fotografisë Marubi në qytetin verior të Shkodrës është një mrekulli. Fotografi me origjinë italiane Pietro Marubi hapi studion e parë të fotografisë në Shqipëri këtu në mesin e shekullit të 19-të, kur vendi ishte nën sundimin osman. Gjatë tre brezave ai, nxënësi i tij Kel dhe djali i Kelit, Gegë, dokumentuan një periudhë magjepsëse të historisë shqiptare, që nga fillimet e lëvizjes për pavarësinë e Shqipërisë, përmes luftës ballkanike dhe asaj të dytë botërore, deri në komunizmin e Enver Hoxhës,thuhet ne artikull.
Më tej prestigjiozja britanike thekson se koleksioni i fotografive të ekspozuara tregojnë bukur të gjitha sferat e jetës – revolucionarë, fermerë, politikanë, muzikantë, përfaqësues të feve, shumëllojshmërinë e mahnitshme të veshjeve tradicionale shqiptare, etj.
Klan News