Muzeu mobil “Luftërat e Çanakalasë”, ka hapur dyert për vizitorët në Tiranë, raporton Anadolu.
Ndalesa e parë e këtij muzeu në Shqipëri ishte në qytetin e Shkodrës, ndërkohë për disa ditë do të qëndrojë i hapur edhe në Tiranë.
Në Sheshin “Skënderbej” në kryeqytet, muzeu është vizituar nga qytetarë të moshave të ndryshme, nxënës dhe studentë.
Ky muze mobil i cili përmban objekte nga luftërat e Çanakalasë dhe ofron shfaqje digjitale do të qëndrojë i hapur për vizitorët në Tiranë nga datat 21-26 mars dhe më pas do të vizitojë edhe qytetin e Elbasanit.
Muzeu, i cili u përgatit për të përcjellë frymën e Çanakalasë te brezat e ardhshëm, përmban fotografi, objekte lufte, artefakte historike të asaj periudhe si dhe shfaqje digjitale.
Ky muze lëvizës do të vizitojë edhe vende të tjera të Ballkanit.
