Ish-ministri i Drejtësisë, Eduard Halimi, ka reaguar për ndarjen e papritur nga jeta të ish-kryetarit të Gjykatës së Vlorës, Skënder Haluci, në moshën 64-vjeçare.
Në një reagim në rrjetet sociale, Halimi shprehet i tronditur nga lajmi, ndërsa kujton njohjen dhe miqësinë e gjatë me Halucin, duke thënë se e kishte njohur rreth 35 vite më parë në Fakultetin e Drejtësisë.
Halimi tregon se Haluci i kishte rrëfyer gjatë viteve të universitetit për dënimin me vdekje që kishte marrë gjatë regjimit komunist, nën akuzën për një atentat të pretenduar ndaj Ramiz Alisë.
Sipas tij, kjo histori i kishte afruar edhe më shumë dhe miqësia mes tyre kishte zgjatur për më shumë se tri dekada.
“Sot më rëndon mendimi se sa herë e shtymë atë drekën tonë. I shtyjmë takimet me miqtë dhe shokët, me bindjen se kemi kohë: jo sot, nesër; jo këtë javë, javën tjetër, jo në gusht por në shtator! Derisa vjen një ditë si kjo dhe kupton se koha nuk na është premtuar, nuk e kemi në dorë. Se disa takime, po i shtymë gjatë, mbeten përgjithmonë pa u bërë.”, shkruan ai.
Reagimi i plotë:
I pabesueshëm lajmi për ndarjen nga jeta të Skënder Halucit, njeriut që regjimi komunist e kishte dënuar me vdekje!
Na bashkoi Fakulteti i Drejtësisë, 35 vjet më parë. Na afruan padyshim pikëpamjet tona politike, historitë familjare, por mbi të gjitha na lidhi një shoqëri e gjatë.
Kur, në fakultet, më tregoi për herë të parë se regjimi komunist e kishte dënuar me vdekje, nën akuzën për një atentat ndaj Ramiz Alisë, pothuajse nuk e besova. Ishte një histori që dukej e pabesueshme për ne që sapo po njiheshim. Prej asaj kohe u bëmë shokë dhe mbetëm të tillë për më shumë se tri dekada.
Sot më rëndon mendimi se sa herë e shtymë atë drekën tonë. I shtyjmë takimet me miqtë dhe shokët, me bindjen se kemi kohë: jo sot, nesër; jo këtë javë, javën tjetër, jo në gusht por në shtator! Derisa vjen një ditë si kjo dhe kupton se koha nuk na është premtuar, nuk e kemi në dorë. Se disa takime, po i shtymë gjatë, mbeten përgjithmonë pa u bërë.
Lamtumirë, miku im Skënder.
U prehsh në paqe!
The post Ndarja nga jeta i Skënder Halucit, ish ministri i Drejtësisë Eduard Halimi: Ishim shokë për më shumë se tri dekada! Më rëndon mendimi sesa shumë e shtymë drekën tonë appeared first on Gazeta Shqiptare Online.
