Mbi 40 shkolla fillore në Mal të Zi kanë pezulluar mësimin pas mesazheve kërcënuese për bomba. Presidenti Millo Gjukanoviç dyshon se kërcënimet synojnë destabilizimin e vendit lidhen me votimin e qeverisë së re të Abazoviç ditën e enjte.
41 shkolla fillore janë mbyllur në Mal të Zi me urdhër të ministrisë së Arsimit pas disa raportimeve anonime për bomba.
Drejtoria e Policisë ka dërguar ekipet për inspektim nëpër shkolla, ndërsa është bërë evakuimi i nxënësve në Podgoricë, Tivar, Kotorr, Ulqin, Rrozhajë, Kolashin, Nikshiç, Berane, Bijello Pollje, Herceg Novi, Cetinje dhe Andrijevica.
“Në territorin e shkollës janë vendosur shumë bomba. Ne gjithmonë kemi ëndërruar për hakmarrje. Do marrim hak, do vijmë në shkolla. Ne do t’i vrasim të gjithë. Askush nuk do të qëndrojë gjallë. I gjithë qyteti do të rrjedhë gjak”, ishte mesazhi kërcënues.
Nga Podgorica kanë mbërritur ekipet speciale për të inspektuar objektet.
Presidenti i vendit Millo Gjukanoviç përmes një reagimi në Twitter i ka quajtur kërcënimet, tentativa për të destabilizuar vendin përpara votimit të qeverisë së re të enjten.
Gjukanoviç: Nuk duhet të lejojmë që procesi më i rëndësishëm i një shoqërie, siç është arsimi të vuajë për shkak të atyre që provokojnë emergjenca për të destabilizuar vendin përpara zgjedhjes së qeverisë së re. Siguria e fëmijëve dhe të gjithë qytetarëve, duhet të jetë prioritet absolut i shtetit dhe i çdo individi. Edhe njëherë bëj thirrje që të merren masat për zbardhjen e kësaj ngjarjeje dhe për zbulimin e autorëve dhe organizatorëve të këtyre akteve.
Të enjten në Mal të Zi pritet që të votohet qeveria e re e udhëhequr nga shqiptaro-malazezi Dritan Abazoviç.
© SYRI.net
