Shtyrja e vendimit – nga ana e autoriteteve gjyqësore në Francë – lidhur me lirimin apo ekstradimin e Ramush Haradinajt – ngre dyshime lidhur me legjitimitetin e një vendimi të tillë, ka thënë në një prononcim për Telegrafin, Ehat Miftaraj nga Instituti i Kosovës për Drejtësi. Sipas tij, shtyrja e vendimit lidhur me procedurën gjyqësore për ekstradim, bie ndesh me vet frymën e Konventës së Francës për Ekstradim – si palë nënshkruese e saj.
“Franca është shtet me kulturë të gjatë ligjore dhe ndër shtetet themeltare të promovimit dhe respektimit të drejtave dhe lirive të njeriut. Shtyrja e marrjes së vendimit, me arsyetimin e dhënies kohë shtesë autoriteteve serbe për të ofruar fakte tjera lidhur me kërkesën për ekstradim, bie ndesh me vet frymën e Konventës për Ekstradim dhe me vlerat dhe parimet për mbrojtjen e të drejtave dhe lirive të njeriut”, ka thënë Miftaraj.
Sipas tij, kjo konventë përcakton saktë nëse dokumentet e dërguara nga Serbia janë të pamjaftueshme për t’ju mundësuar autoriteteve gjyqësore në Francë për të marrë një vendim meritor në bazë të Konventës.
“Franca duhet të kërkojë informata shtesë dhe duhet të caktojë afat kohor për pranimin e këtyre dokumenteve nga ana e autoriteteve serbe. Përderisa autoritetet franceze i kishin ofruar një afat të tillë autoriteteve serbe gjatë muajit shkurt, është e pakuptimtë se si ky afat është shtyrë apo është i ri një kohë shtesë”, shtoi ai.
Ndryshe, gjatë ditës së sotme është mbajtur seanca për Ramush Haradinaj, e cila seancë rezultoi me shtyrjen e vendimit për lirimin e tij. /Telegrafi/
