Gazetar: Mihajllo Donev
Një fëmijë 13 vjeçar me lëndim të rëndë në dorë është pranuar në Klinikën për sëmundje ortopedike gjatë natës së ndërrimit të viteve. Drejtori i Klinikës Ortopedi e Traumatologji Igor Merxhanoski tha se fëmija me gjasë do të mbetet me aftësi të kufizuar në dorën e tij. Krahas këtij rasti, Merxhanoski e cilësoi mbrëmjen relativisht të qetë dhe me numër të ulur të pacientëve në krahasim me vitet e kaluara.
“Kemi fëmijë 13 vjeç që ka dëmtim të rëndë në dorë nga fishekzjarrët, mendoj se tashmë është operuar në Klinikën e kirurgjisë së fëmijëve dhe ndoshta do të ketë invaliditet në dorën e tij. Kemi pranuar edhe një shtetas të huaj në gjendje të alkoolizuar i cili ka lëndim në hundë dhe kokë, është kujdesur dhe është liruar për mjekim në shtëpi”, deklaroi Igor Merxhanoski – drejtor i klinikës TOARILUC.
Në Klinikën e toksikologjisë, një djalë 14-vjeçar dhe një vajzë 17-vjeçare janë pacientët më të rinj të pranuar mbrëmë, ndërsa drejtori i kësaj klinike tha se ka edhe rënie të numrit të pacientëve.
“Kujdestaria e Vitit të Ri kaloi qetë, gjithsej janë kontrolluar 21 pacientë, 18 prej tyre me helmim akut nga alkooli. Nga ata 18, katër janë femra kurse 14 meshkuj. Pacientja më e re femër është 17 vjeç, më e moshuara 26, pacienti më i ri mashkull është 14 vjeç kurse më i moshuari është 38 vjeç”, tha Andon Çibishev – drejtor i klinikës së toksikologjisë.
Në Traumatologji janë pranuar gjithsej 35 pacientë, nëntë nga aksidente trafiku por me lëndime të lehta kurse dy me përleshje fizike. Klinika për sëmundje kirurgjike kishte numrin e zakonshëm të pacientëve si çdo ditë. Mbrëmë janë kontrolluar 81 pacientë, pesë nga aksidente, tre nga përleshjet fizike kurse janë bërë tre intervenime. /Alsat.mk
