Herët në mëngjes në Koçan, pas një debati të mëparshëm, një mesoburrë ka sulmuar fizikisht një grua 46-vjeçare, duke i dhënë asaj plagë vdekjeprurëse me thikë nga e cila ka ndërruar jetë.
Vrasja ka ndodhur para shtëpisë ku jetonte gruaja teksa po bëhej gati për të shkuar në punë, ndërsa ngjarjen e konfirmojnë SPB – Shtip dhe Spitali i Përgjithshëm në Koçan.
– Mëngjesin e sotëm rreth orës 06:15 në rrugën “Straho Erbapce” në Koçan, 59-vjeçari U.R. ka sulmuar 46-vjeçaren T.M. gjatë së cilës i ka shkaktuar plagë të shumta me thikë në trup, pas së cilës ajo ka ndërruar jetë. Ekipi mjekësor i thirrur ka konstatuar më shumë se 40 plagë me thikë nga të cilat gruaja ka ndërruar jetë në vend, theksoi Dushanka Gorgieva – Trpevski, drejtoreshë e Spitalit të Përgjithshëm.
Sipas gjetjeve fillestare, arsyeja e sulmit ishte zhvatja e parave dhe kërcënimi për video komprometuese që sulmuesi kërcënoi t’i bënte publike. Kërcënimet janë raportuar disa herë në polici dhe në prokurorinë publike në Koçan, nga ku gruaja ka kërkuar mbrojtje.
Ngjarja është hetuar nga ekipi i hetuesisë– Koçan dhe prokurori publik, me urdhër të të cilit trupi i pajetë e të ndjerës është dërguar për obduksion. Sulmuesi është ndaluar dhe pas dokumentimit të plotë të rastit ndaj tij do të bëhet kallëzim përkatës.
