Deputeti i Partisë Demokratike, Agron Gjerkmarkaj, ka komentuar ngushtimin e diferencës mes PS-së dhe koalicionit PD-ASHM pas numërimit të votave nga Greqia, ku koalicioni rrezikon të humbasë një mandat.
Gjerkmarkaj u shpreh se shpreson që një gjë e tillë të mos ndodhë, pasi sipas tij kandidati demokrat Kastriot Piroli ka bërë një betejë të shkëlqyer dhe një fushatë mbresëlënëse.
“Shpresoj të mos ndodhë sepse Kastriot Piroli ka bërë betejë të shkëlqyer, ka bërë fushatë mbresëlënëse. E ka fituar mandatin dhe të hiqej do ishte një mëkat, të krijon ndjesi dhunimi, më tepër se sa zhgënjim apo farsë elektorale siç e quajmë ne. Qytetarët e Lezhës ia kanë besuar atij mandatin,” u shpreh Gjerkmarkaj.
