Ambasadori i Mbretërisë së Bashkuar në Kosovë, Ruairi O’ Connel, ka komentuar sot rreth proceseve politike nëpër të cilat po kalon Kosova që nga shpallja e pavarësisë, me theks të veçantë në krijimin e një kuadri ligjor të avancuar për të drejtat e secilit qytetar të Kosovës.
O’Connell mes tjerash ka thënë se luftimi i korrupsionit në Kosovë vazhdon të cilësohet si prioritet për institucionet e vendit, por në praktikë nuk ka rezultate reale.
“Nga perspektiva ime personale, e di që Kosova dhe populli i saj meriton për të jetuar në një vend ku sundon ligji, ku njerëzit e korruptuar hetohen, ndiqen penalisht dhe gjykohen për sjelljet dhe veprimet e tyre të kundërligjshme. Ne kemi të njëjtin interes: të mos e lëmë Kosovën të shembet për shkak të interesave të njerëzve të korruptuar”, tha diplomati O’Conell në një ligjëratë që mbajti sot për studentët e Kolegjit AAB, me temën “Ndihma e Mbretërisë së Bashkuar në luftimin e korrupsionit në Kosovë”.
Më tutje, sipas njoftimit nga ky Kolegj, ambasadori britanik ka thënë se luftimi i korrupsionit duhet të udhëhiqet brenda institucioneve dhe shembulli do të duhej të jepej së pari prej aty. Por, gjithashtu, ambasadori tha se esenciale për luftimin e korrupsionit është reagimi qytetar.
“A është e tolerueshme që të shohim skandale të njëpasnjëshme të përfshirjes në afera të dyshimta korruptive pikërisht të zyrtarëve që janë zbatues të ligjit dhe të njëjtën kohë të mos shohim ndëshkimin e tyre? Kjo duhet të ndryshojë nga ju studentë të rinj të Kosovës, ju keni fuqinë t’i thoni stop një herë e mirë praktikave të deritashme”, ka thënë O’Connell.
Në këtë ligjëratë, ambasadori britanik foli edhe për një problem tjetër me të cilin përballet shoqëria kosovare, e ajo sipas tij është nepotizmi dhe klientilizmi.
“Unë e di që Kosova ka njerëz të aftë, njerëz të shkolluar të cilët kanë mundësi të ofrojnë kontributin e vet për shtetin, por nëse brenda sistemit publik, janë punësuar njerëz vetëm për shkak të lidhjeve partiake, politike ose familjare, kjo jo vetëm që përjashton mundësinë për të krijuar një sistem efikas, por gjithashtu krijon borxhe brenda sistemit që duhet t’i paguhet dikujt”, u shpreh O’ Connell.
I pyetur nga studentët për demarkacionin me Malin e Zi ambasadori O’ Connell u përgjigj duke thënë se Kosova është shtet i pavarur dhe sovran. Andaj, çështja e ratifikimit të marrëveshjes së demarkacionit të kufirit me Malin e Zi është çështje bilaterale në mes të Kosovës dhe Malit të Zi.
Në fund të ligjëratës ambasadori Britanik në Kosovë Ruairi O’Connell tha se gjeneratat e reja të këtij vendi janë ata njerëz që do ta ndihmojnë shtetin e Kosovës në luftimin e korrupsionit.
© KOHA.
