Dhjetëra policë të EULEX-it kanë rrethuar mëngjesin e sotëm fshatin Koshevicë të Podujevës. Krejt kjo, për një ngjarje që ka ndodhur para 13 vjetësh.
Burime brenda EULEX-it kanë thënë për Gazetën Express se bastisjet e sotme janë kryer për dy vrasje të dy policëve të UNMIK-ut në vitin 2004.
Sipas të njëjtit burim, në këtë aksion ka edhe persona të arrestuar.
“EULEX ka kryer një aksion për vrasjen e dy policëve të UNMIK-ut dhe tentim vrasjen e dy policëve të tjerë, që ka ndodhur në vitin 2004 në fshatin Koshevicë të komunës së Podujevës”, ka thënë ky burim nga EULEX-i për Express.
“Ka edhe persona të arrestuar për posedim ilegal të armëve”.
E aksioni për bastisje nisi në këtë fshat, pasi gjithçka nisi aty në vitin 2004.
Ish-ushtari i UÇK-së, Agron Sylejmani, tashmë i ndjerë, së bashku me Shkumbin Mehmetin, në vitin 2004 kanë vrarë edhe një polic të Kosovës dhe një polic të UNMIK-ut. Me këtë rast është plagosur Shkumbin Mehmeti dhe gjendet në burg i dënuar me 30 (tridhjetë) vjet, ndërkaq Agron Sylejmani është vrarë.
Ndërkaq, edhe Ruzhdi Shaqiri u vra në gusht të vitit 2014.
Sipas Prokurorisë së EULEX-it, Agron Sylejmani, dhe të tjerë të panjohur, kanë vrarë Bekim Kastratin, Besim Dajakun dhe kanë plagosur rëndë Gani Gecin.
Prokurori i EULEX-it, Robert Kucharski, i ka dërguar një shkresë zyrtare z. Hajriz Kastratit, babait të Bekim Kastratit të vrarë, me anë të së cilës shkresë e njofton se Prokuroria Speciale ka pushuar hetimet për këtë rast, duke konstatuar se personi i identifikuar si doras, Agron Sylejmani ka vdekur.
Prokurori i EULEX-it në shkresë, i bën një përshkrim të biografisë së Agron Sulejmanit.
Sylejmani ishte nga fshati Kushevicë komuna e Podujevës
