Zëvendëskryeministri dhe shefi i diplomacisë kosovare, Behgjet Pacolli, thotë se akreditimi diplomatik dhe dorëzimi i letrave kredenciale i Ambasadorit të Kosovës tek Presidenti i Gambisë, Adama Barrow, “ishte përgjigja më e merituar ndaj propagandës dhe qëllimeve malinje të Daqiçit dhe diplomacisë serbe për minimin e kredibilitetit dhe subjektivitetit ndërkombëtar të Kosovës”.
“Ministrit të jashtëm serb i thash në sy në Sarajevë mos më ndjek dhe mos shpenzo energji të kota se betejën e keni të humbur”, ka thënë Pacolli, përmes një postimi në Facebook.
Pacolli thotë se habit fakti se si mediat tona raportonin lajme të tilla të rreme dhe pa verifikim faktesh se kinse “Gambia do të tërhiqte njohjen”.
“E kam thënë edhe më herët se e ashtuquajtura ‘tërheqje e njohjes’ nuk ekziston në të Drejtën Ndërkombëtare dhe kjo është vetëm propagandë serbe për të krijuar mjegull dhe huti”, ka thënë Pacolli.
