Partia Kristian Demokrate Flamane (CD & V) në Belgjikë ka reaguar pas lajmit se kandidati për Asamble Komunale në Antwerp, politikani me origjinë shqiptare Rediart Cankja është kapur me 3 kilogram heroinë në Francë vetëm një muaj para zgjedhjeve në Belgjikë.
Kryetari i CD & V, Kris Peeters ka thënë se nëse vërtetohet lidhja e politikanit shqiptar me 3 kilogramët e drogës që i janë kapur, atëherë Cankja nuk do të jetë në listë.
“Nëse ky lajm është i saktë, është e qartë se ai nuk mund të jetë në listë”, deklaroi Peeters, raporton Neiuws Blad.
“Ne kemi 55 kandidatë për Asamble Komunale në Antwerp dhe ka edhe kandidatë nga rrethet e tjera. Ky është numër i madh dhe gjithashtu nuk kemi mundësi të dërgojmë Siguri Shtetërore tek secili prej tyre”, ka thënë Peeters.
Peeters thekson se degët e partive janë përgjegjëse për shqyrtimin e kandidatëve.
“Ne përpiqemi të vlerësojmë njerëzit në mënyrë korrekte, por këta njerëz gjithashtu duhet të jenë të sinqertë. Më vjen keq për këtë, por për fat të keq kjo mund të ndodhë”, u shpreh ai.
