Në qershor pritet të nisë rundi i ri i bisedimeve për normalizimin e marrëdhënieve mes Kosovës dhe Serbisë, i lehtësuar nga Bashkimi Evropian.
Por, fundi i majit e gjen Kosovën pa unitet të brendshëm për dialogun në Brukselit, raporton KTV.
Përkundër se Qeveria ka prezantuar një platformë për fazën finale të bisedimeve, e njëjta platformë, që ndër të tjera parasheh që dialogu të udhëhiqet nga presidenti, nuk ka marrë përkrahjen e Komisionit për Punë të Jashtme.
Në Partinë Demokratike, insistojnë që ish-kryetari i saj t’u prijë bisedimeve.
Por, kundër kësaj kanë dalë disa prej partive në opozitë e pushtet.
Kundërshtimin e ka përsëritur në një reagim të tij, shefi i Grupit Parlamentar të Lidhjes Demokratike, Avdullah Hoti.
Ndërkohë, Hoxhaj pret që bisedimet me Serbinë të përfundojnë në fund të këtij viti ose më së largu deri në gjysmën e vitit 2019, me njohjen reciproke mes vendeve.
Takimi i fundit i presidentit Hashim Thaçi me homologun serb, Aleksandar Vuçiq, si pjesë e bisedimeve, ishte mbajtur në fund të marsit.
