Partia Demokratike e Kosovës dhe Lëvizja Vetëvendosje janë përballur me një situatë të ndërlikuar në lidhje me procedurën e ndryshimit të Ligjit për Dhomat e Specializuara, pavarësisht se kanë shprehur gatishmërinë për të bërë disa ndryshime të nevojshme.
Juristët janë ndarë në dy grupe lidhur me mënyrën e veprimit – disa sugjerojnë që ndryshimet të bëhen në Komisionin për Legjislacion dhe më pas të votohet në seancë, ndërsa të tjerë mendojnë se duhet të votohet fillimisht për rrëzimin e vendimit të Presidentes.
Burime të Gazetës Express kanë bërë të ditur se LVV dhe PDK kanë arritur një marrëveshje për opsionin e dytë, që do të thotë se ligji do të kalojë në seancë plenare për të votuar rrëzimin e vendimit të Presidentes.
Një zyrtar i lartë, që ka folur në kushte anonimiteti, ka theksuar se nëse ligji kalon, ai do të hyjë automatikisht në fuqi, duke e bërë të mundur që procedurat për amendamentimin e tij të fillojnë menjëherë pas kësaj.
“Do të ketë një premtim publik sot se ligji do të amandamentohet menjëherë, që do të thotë se procesi do të nisë të hënën e ardhshme,” ka thënë zyrtari për Gazetën Express.
Pra, Kuvendi pritet të miratojë ligjin në formën e tij aktuale, para se të fillojë procedurat për ndryshimet e mëtejshme.
Sipas nenit 80, paragrafi 4, të Kushtetutës së Kosovës, Kuvendi ka të drejtë të vendosë për miratimin e ligjit të rikthyer nga Presidenti, dhe nëse miratohet, ligji konsiderohet i shpallur.
Me këtë, Presidentja nuk ka mundësi ta kthejë për herë të dytë të njëjtin ligj. Nëse Kuvendi e miraton sërish, vendimi i saj për kthimin e ligjit tejkalohet.
Një ligj hyn në fuqi 15 ditë pas publikimit në Gazetën Zyrtare të Republikës së Kosovës, përveç nëse ndryshe është përcaktuar me vetë ligjin.
