Një ngjarje e rëndë ka ndodhur në qytetin e Durrësit, ku një 36-vjeçar është plagosur me armë zjarri.
Burime për News 24 bëjnë me dije se i plagosuri është identifikuar si Arbër Gorea. Pavarësisht plagëve të marra, Gorea ka mundur të shkojë vetë në stacionin e policisë, ku ka kërkuar ndihmë nga efektivët për t’u transportuar në spital.
Ai është dërguar me urgjencë në Spitalin Rajonal të Durrësit dhe ndodhet aktualisht në sallën e operacionit.
Sipas informacioneve paraprake, dyshohet se 36-vjeçari ka qenë në lëvizje në momentin kur është qëlluar me armë zjarri. Rrethanat dhe motivet e ngjarjes janë ende të paqarta.
Policia ka nisur hetimet për zbardhjen e plotë të ngjarjes dhe identifikimin e autorit.
Njoftimi i policisë
DVP Durrës/Informacion paraprak
Rreth orës 20:00, në zonën e Fllakës, dyshohet se për motive të dobëta është plagosur me armë zjarri shtetasi A. G., 36 vjeç, banues në Durrës, aktualisht jashtë rrezikut për jetën.
Shërbimet e Policisë dhe Grupi hetimor ndodhen në vendngjarje dhe vijojnë kontrollet dhe hetimet për identifikimin dhe kapjen e autorit, sqarimin dhe dokumentimin ligjor të rrethanave të ngjarjes.
