Dy policët që janë zhdukur gjatë të shtunës mbrëma në lumin Lepenc ende nuk janë gjetur edhe pas shumë kërkimeve që janë bërë nga Institucionet kosovare. Policia e Kosovës ka njoftuar se perimetri i hetimeve në kërkim të dy policëve të zhdukur është zgjeruar. Kërkimet janë duke u bërë edhe njëherë në zonën malore duke rritur perimetrin në këtë zonë.
Zëdhënësi i Policisë së Kosovës për rajonin e Ferizajit, Agim Gashi, ka deklaruar se edhe gjatë ditës së mërkurë janë duke u bërë hetime nga pjesëtarë të Policisë, Forcave të Sigurisë së Kosovës dhe qytetarë vullnetarë, shkruan gazetametro.net.
“Nga ora 9: 00 e mëngjesit kanë filluar kërkimet. Në vendin e ngjarjes dhe në zonën malore është hapur perimetri i kërkimeve. Pjesa tjetër e njësitëve prej kilometrit të pestë dhe nga kufiri i Maqedonisë për herë të dytë është duke u kontrolluar. Sot në kërkim po marrin pjesë 150 persona, por që deri më tani nuk ka asgjë konkrete”, ka bërë të ditur Gashi.
Kjo është dita e katërt e kërkimeve që po bëhen për të gjetur dy policët që janë zhdukur nga aksidenti që u ka ndodhur të shtunën.
Policët e aksidentuar kanë qenë në një makinë zyrtare në magjistralen Hani i Elezit – Kaçanik dhe më pas vetura ka rënë nga ura e lumit Lepenc.
