Presidenti iranian Hassan Rouhani tha se nuk i zbuloi “disa fakte” për publikun me arsyetimin se do të dëmtonin unitetin kombëtar, transmeton Anadolu Agency (AA).
Sipas televizionit shtetëror iranian, Rouhani vlerësoi presidencën tetëvjeçare në fjalimin e tij pas takimit të fundit të kabinetit të qeverisë së 12-të.
“Takimi i sotëm ishte takimi i fundit i kabinetit qeveritar të mandatit të 12 -të. Në këtë kontekst, është fjalimi im i fundit. Deklaratat që i bëmë publikut ndër vite nuk ishin të pavërteta. Ne kemi paraqitur të vërtetën. Por unë nuk zbulova disa fakte sepse nuk mendoja se do të ishin të dobishme dhe sepse kisha frikë se do të dëmtonte unitetin kombëtar”, tha Rouhani.
Duke theksuar se pavarësisht përpjekjeve të qeverisë që ai drejton, disa elementë në vend parandaluan heqjen e sanksioneve, ai shtoi: “Nëse harmonia kombëtare do të ishte më e madhe dhe nuk do të kishte distanca mes tyre, situata e vendit do të ishte më e mirë nëse organet e tjera shtetërore do ta mbështetnin qeverinë në bashkëpunim”.
Presidenti Rouhani i kërkoi falje publikut për gabimet e tij dhe falënderoi anëtarët e kabinetit.
Politikani konservator Ebrahim Reisi, i cili fitoi zgjedhjet presidenciale të mbajtura në qershor, pritet të marrë postin nga Rouhani me një ceremoni që do të mbahet më 3 gusht.
