Presidenti i vendit, Hashim Thaçi ka thënë se asnjë iniciativë e qytetarëve dhe deputetëve që është në përputhje me Kushtetutën nuk është përplasje me bashkësinë ndërkombëtare, raporton Gazeta Blic.
Thaçi në një intervistë dhënë për RTV21 ka mohuar se kërkesa për zhbërjen e Speciales sjellë përplasje me ndërkombëtarët.
Ndryshe, Ambasada e Shteteve të Bashkuara të Amerikës në Kosovë ka lëshuar sot një komunikatë për media ku përsëritet qëndrimi i shtetit amerikan se marrëdhëniet kosovaro-amerikane do të dëmtoheshin po që se Kuvendi shfuqizon ligjin për Gjykatën Speciale.
“Gjatë kësaj jave udhëheqësit e Kosovës kanë bërë deklarata të përsëritura publike duke thënë se një iniciativë lidhur me Gjykatën Speciale, e ndërmarrë në Kuvendin e Kosovës, nuk do të dëmtojë marrëdhëniet ndërkombëtare të Kosovës. Ata e kanë gabim. Çfarëdo përpjekje e tillë e përsëritur do të kishte pasoja të thella negative për të ardhmen evropiane të Kosovës dhe për marrëdhënien e saj me Shtetet e Bashkuara”, thuhet në deklarimin e ambasadës.
“Gjithashtu, kërcënimet me dhunë janë tërësisht të papranueshme, dhe qartësisht dhe pa mëdyshje ato duhet të hidhen poshtë nga Qeveria”.
“Jemi jashtëzakonisht të dëshpëruar me ata që do të sakrifikonin të ardhmen e shtetit të tyre dhe përkrahjen e patundur të Shteteve të Bashkuara në favor të interesave të tyre personale”./GazetaBlic
