Prokurori publik nga Prokuroria Themelore Publike në Shkup mbrëmë ka inspektuar vendin e një aksidenti të rëndë trafiku në afërsi të qendrës tregtare në Shkup, ku një person ka humbur jetën dhe një tjetër është lënduar.
– Advertisements –
Sipas informacioneve fillestare, aksidenti ka ndodhur kur vetura e pasagjerëve “Citroen C4”, e drejtuar nga një 22-vjeçar ka përplasur dy këmbësorë, një vajzë dhe një djalë 24-vjeçar, të cilët po kalonin rrugën. Vajza ka ndërruar jetë në vend, ndërsa djali që ishte me të ka mbetur i plagosur dhe është dërguar në spital.
Me urdhër të prokurorit, drejtuesi i veturës është arrestuar menjëherë pas aksidentit dhe është ndaluar në stacionin policor. Prokurori publik ka urdhëruar kryerjen e obduksionit të trupit të të ndjerit, si dhe ka urdhëruar ekspertizën e mostrave të gjakut dhe urinës nga vozitësi i veturës për të vërtetuar nëse i njëjti ka qenë duke vozitur nën ndikimin e alkoolit apo substancave të tjera të paligjshme.
Është lëshuar urdhri për sigurimin e pamjeve video të vëzhgimit të vendit të aksidentit. Ndërmerren veprime të tjera për zbardhjen e plotë të rastit, pas së cilës do të vendoset për veprime të mëtejshme.
