Bashkimi Evropian duhet të marrë në konsideratë kufizimin e përkohshëm të të drejtave të caktuara të votimit për anëtarët e rinj të ardhshëm të bllokut dhe krijimin e më shumë mekanizmave për të mbrojtur sundimin e ligjit, sipas një dokumenti të përbashkët nga Gjermania, Franca, Holanda, Belgjika dhe Luksemburgu, të cilin Reuters e ka parë .
Ndërsa Mali i Zi shpreson për anëtarësim në BE në vitin 2028, dhe Shqipëria, Ukraina dhe Moldavia shtyjnë përpara proceset e tyre të integrimit evropian, po zhvillohen diskutime intensive midis qeverive evropiane nëse rregullat për anëtarët e rinj duhet të ndryshohen.
BE-së po i kërkohet të zhvillojë mekanizma më të fortë për të mbrojtur anëtarët e ardhshëm, pjesërisht për shkak të përvojës së bllokut me rënien e demokracisë në Hungari nën drejtimin e ish-kryeministrit Viktor Orban.
Dokumenti përshkruan opsionet e mundshme që mund të përfshihen në traktatet e ardhshme të pranimit, duke përfshirë një mekanizëm të ri monitorimi dhe një klauzolë mbrojtëse që do të lejonte marrjen e masave në rast të pengesave serioze në fusha të tilla si demokracia dhe liria e medias.
“BE-ja duhet të zhvillojë një diskutim të thelluar mbi mundësitë e kufizimeve të përkohshme dhe kalimtare mbi të drejtat e votës për shtetet e reja anëtare, veçanërisht në pjesë të ligjit evropian ku kërkohet unanimitet”, shkruan pesë vendet, duke iu referuar vendimeve mbi zgjerimin, politikën e jashtme dhe buxhetin e BE-së, të cilat ndonjëherë kërkojnë marrëveshjen e të gjitha shteteve anëtare.
