Ligji i ri për mbrojtjen e konsumatorëve të cilin ditë më parë e miratoi Kuvendi, obligon marketet t’i publikojnë çmimet online. Por kjo për qytetarët është e panjohur. Një pjesë e tyre nuk dinë se si t’i qasen kësaj mundësie. Me ndryshimet e bëra, disa qytetarët besojnë se nuk do të sjellë ulje çmimesh, ndërsa të tjerë mendojnë se do të nxisë konkurrencën mes marketeve.
“Për këto njerëz që janë më të moshuar, që nuk kanë internet, nuk ndikon tek ato asgjë”, tha një qytetar.
“Tani për tani nuk i ulin, se shumë janë, shumë të shtrenjta janë”, u shpreh një tjetër qytetar.
“Formë shumë e mirë është, se është konkurrenca atëherë në pyetje, çdokush i sheh çmimet se sa janë”, nënvizoi një qytetar.
“Nuk e dimë, ato çmimet veç kanë hyp, domethënë nuk e di a do të ketë efekt kjo punë”, u shpreh një tjetër qytetar.
“Nuk i ulin, nuk i ulin zemër, ata veç rrejnë, nuk janë tu pa askush për popullin jo harroje”, tha një qytetar.
“Shpresoj që do të ulen çmimet me këtë masë. Por do të shohim”, deklaroi një qytetar.
Me hyrjen në fuqi të ligjit të ri, tregtarët do të jenë të detyruar t’i publikojnë dhe t’i azhurnojnë çdo ditë çmimet e produkteve në faqet e tyre të internetit. Ata që nuk respektojnë këtë detyrim do të përballen me gjoba nga 500 deri në 10,000 euro. Tregtarët kanë afat 45 ditë për t’u përshtatur me rregullat e reja. /Alsat.mk
