Shumë lavazhe në Greqi, të cilat janë nën pronësinë e shqiptarëve po përdoren si aktivitete të pastrimit të parave, të paktën kështu raporton media greke ProNews.gr.
Sipas kësaj media, mafia shqiptare në Greqi hap qendra lavazh, si një mënyrë për të pastruar paratë nga aktivitete kriminale si prostitucioni apo narkotikët.
ProNews.gr raporton se sipas të dhënave nga uniformat blu helenike, AADE dhe Ministria e Financave, këto lavazhe lajnë deri në 500 makina në ditë, një numër jashtëzakonisht i lartë ashtu sikurse dhe në dukje e pamundur.
Vetëm në një lavazh pranë një restoranti luksoz në Glyfadhes, raportohet për më shumë se 300 larje makinash në ditë, automjete këto “ultraluksoze” dhe me targa të huaja.
Për shkak të këtij lavazhi, sipas medias fqinje po hetohen firmat nga shërbimet shtetërore, ashtu sikurse dhe vetë Bashkia Glyfada.
Po në këtë zonë, dyshohet se një tjetër lavazh përdoret nga grupet kriminale për të njëjtin qëllim, pastrimin e parave.
Në zonat e Pireut, Petrou Ralli, Mesogeia, Nikaia dhe Ilioupoli, gjenden lavazhe të tjera, dokumentet e së cilës janë në mungesë. Këtu nisin dhe dyshimet për ndërhyrje nga njerëz me pushtet vendor të këtyre zonave, pasi mendohet të kenë mbështetur në licencimin e këtyre lavazheve. Për këtë arsye, këta punonjës janë vënë nën “radarin” e hetimeve për shkelje të detyrave të tyre.
Sakaq, media helene shkruan se në dy raste, punëtorët shqiptarë të lavazheve, kanë kopjuar çelesat e automjeteve që vinin për t’u larë, për t’i vjedhur më pas për llogari të bandave me aktivitet vjedhjen e mjeteve.
Më tej shkruhet se “ka të dhëna të qarta se pronarët e padukshëm janë të dënuar shqiptarë që kontrollojnë bizneset nga burgu.”
Për të gjitha këto, deri më tani nuk ka asnjë të arrestuar apo emër të publikuar, por media greke pohon se po hetohen thellësisht për provimin e këtyre aktiviteteve.
