“Rusia dënon me forcë aktin terrorist të vrasjes së Oliver Ivanoviqit dhe kërkon hetim të duhur me pjesëmarrjen e përfaqësuesve të autoriteteve kompetente serbe si dhe të organizatave ndërkombëtare në përputhje me Rezolutën 1244 të Kombeve të Bashkuara”.
Kështu ka deklaruar sot, ambasadori rus në Serbi, Aleksander Chepurin gjatë një takimi me presidentin serb, Aleksandar Vuçiq, duke shtuar se vizita e tij në Kosovë paraqet një akt të guximshëm, transmeton lajmi.net.
Chepurin ka shprehur ngushëllimet e tij për vrasjen e Oliver Ivanoviqit dhe theksoi se Rusia e dënon këtë akt terrorist.
Ai ka thënë se Kosova ka dështuar të zbatojë marrëveshjen e Brukselit për krijimin e komunave me shumicë serbe.
Ndërkaq, Vuçiq ka thënë se kjo vizitë ishte shumë e rëndësishme për bashkimin e popullit serb në Kosovë. Ai ka shtuar se Serbia do të bëj përpjekje që serbëve të Kosovës të ju lehtësohet jeta.
Chepurin falënderoi Vuçiqin për kontributin e tij në zhvillimin e marrëdhënieve serbo-ruse.
