Sindikata e Bashkuar e Arsimit, Shkencës dhe Kulturës (SBASHK) do të protestojë sot (e mërkurë, 4 dhjetor), në kërkim të rritjes së pagave dhe zbatim të vendimit për kontratën kolektive. E nëse institucionet nuk reflektojnë, drejtues të SBASHK-ut s’i kanë përjashtuar as grevat.
Protesta para objektit të Qeverisë do të mbahet me fillim prej orës 12:30.
Një ditë më parë, drejtues të kësaj sindikate janë takuar edhe me ministren e Arsimit, Arbërie Nagavci. Por sipas SBASHK-ut takimi rezultoi pa marrëveshje.
Para dy vjetësh, Ministria e Arsimit ka shkëputur kontratën kolektive me SBASHK-un, me arsyetimin se në kohën kur është nënshkruar, ministri i Qeverisë ishte në detyrë dhe ka pasur mungesë legjitimiteti.
Sindikata ka nënshkruar tri kontrata kolektive me pushtetin qendror.
Një në vitin 2014, 2017 dhe tjetra më 2021. Këto kontrata iu mundësojnë mësimdhënësve mbulimin e shpenzimeve për udhëtim, kompensim të shujtës dhe shpërblim jubilar.
Implikimet financiare të këtyre kontratave kanë rënduar kuletën e komunave, pasi asnjëherë në përpilimin e buxhetit vjetor nuk është planifikuar kostoja e detyrimeve që dalin nga kontrata kolektive.
Për mosarritjen e përmbushjes së këtyre detyrimeve, mësimdhënësit kanë paditur komunat, të cilat raste i kanë fituar në gjykatë. Sipas Asociacionit të Komunave të Kosovës, niveli lokal është dëmtuar mbi 120 milionë euro nga paditë e mësimdhënësve.
Për herë të fundit, mësimdhënësit kanë mbajtur grevë në fillim të vitit shkollor 2022-2023, për një muaj.
Së fundi, Qeveria ka vendosur të rrisë sasinë e koeficienteve të pagave për sektorin publik, duke nisur nga 1 janari, e ku përfshihen edhe mësimdhënësit.
