Haradinaj në intervistën e dhënë të tërën në gjuhën serbe ka thënë se dialogu kishte ecur përpara deri kur u nënshkruan marrëveshjet në Bruksel, më 2013.
“Më tutje dialogu nuk pati domethënie të vërtetë. Jemi të shqetësuar, meqë nuk duhet të jetë dialog sa për dialog, por dialog për përparimin e shoqërisë sonë, në të dy vendet. Jam përpjekur që si Qeveri të përgatisim platformën për fazën e ardhshme të dialogut dhe ajo do t’i propozohet Kuvendit tonë ku të gjithë do të kenë mundësinë të japin kontributin”, tha Haradinaj, transmeton lajmi.net.
I pyetur nëse më fund do të formohet Asociacioni i Komunave m e shumicë serbe, Haradinaj u përgjigj se formimi i Asociacionit edhe më tutje ka mundësi të formohet sipas Kushtetutës së Kosovës, e cila formimin e një asociacioni të tillë e sheh si “si organ koordinues, por kurrsesi ekzekutiv”.
Kryeministri i Kosovës për mundësinë e ndarjes së Kosovës ka thënë “Loja me kufijtë është e rrezikshme për Ballkanin, pavarësisht se kush luan me ta”.
“Nuk besoj se ato janë tregime serioze dhe nuk do të doja që për këtë të flas ndonjëherë, meqë e di se çfarë do të pasojë nëse bëjmë lojë me to. Do të pasonin tragjeditë të cilat na kujtohen sot e kësaj dite dhe nuk më duket mençuri të flasim për to. Është shumë gjë e rrezikshme”, ka thënë kryeministri i Kosovës.
Haradinaj ka thënë se demarkacioni i kufirit me Malin e Zi do të zgjidhet dhe Kosova përfundimisht të marrë liberalizimin e vizave.
Për Gjykatën Speciale për krimet e UÇK-së, që do të fillojë punën në Hagë, Haradinaj ka thënë se bëhet fjalë për diskriminim “meqë nuk kërkohet e drejta për të gjitha viktimat, por vetëm për disa sipas seleksionimit kombëtar, që nuk është rruga më e mirë për drejtësi”. Ndonëse ka kundërshtuar më herët këtë gjykatë, tash thotë se Kosova do të përmbushë detyrimet e marra dhe do të bashkëpunojë me gjykatën, raportohet t’i ketë thënë Haradinaj DW-së.
Në pyetjen se a ekziston mundësia e ndarjes së Kosovës ashtu siç po flasin hapur disa politikanë në Serbi, respektivisht ministri i Jashtëm, Ivica Daçiq, kryeministri kosovar është përgjigjur: “Loja më kufij është e rrezikshme në Ballkan, cilido që luan me ato. Nuk besoj që këto janë deklarate serioze dhe nuk do të doja që kurrë të flas për atë”.
“Nëse një gjë e tillë ndodh do të pasojë tragjedia të cilën ende e kemi në mendje dhe nuk është gjë e mençur të flitet për atë. Është shumë e rrezikshme”, ka thënë Haradinaj.
