Shkrimtarja e njohur nga Shqipëria, Flutura Açka, në një shkrim të publikuar në portalin Koha, ka ironizuar me fjalimin e kryeministrit të Republikës Shqiptare, Edi Rama në lidhje me Presidentin Kombëtar – raporton Periskopi.
Vetë Rama e kishte quajtur një gjë të tillë si iracionale, por si një vizion që ishte e drejtë të ëndërrohej.
Açka kritikon Ramën dhe liderët e tjerë se nuk kanë bërë asnjë veprim konkret për të lidhur Kosovën me Shqipërinë. Ajo përmend edhe pamundësinë që librat të qarkullojnë lirshëm mes dy vendeve.
“Në Shqipëri hyjnë më lirë krundet serbe për furrat e bukës se specat dhe kajmaku i Kosovës.” – shkruan ajo.
Ajo ka përmendur edhe një deklaratë të dhënë nga Ministri shqiptar i Diasporës, i cili kishte thënë se “nuk hiqet dogana shqiparo-shqiptare, sepse nuk e lënë interesat e tregtarëve.” Açka e interpreton deklaratën e ministrit si një pranim të shteteve të kapura shqiptare.
Më tej, ajo ka ironizuar edhe me qasjen inferiorizuese e fyese të vet kryeministrit Edi Rama ndaj gjuhës së gegëve. “Do të më pëlqenin, sikur të mos kishte qenë e persëritur sjellja fyese personale e tij ndaj “alpinëve” dhe gjuhës së gegëve dhe atyre që jetojnë jashtë territorit historik të “çunave te Tironës”, një gjuhë që e flet dy e treta e kombit.” – shkruan Açka.
Çështjen e Presidentit kombëtar ajo e quan një show të zbrazët kombëtar. Vetë Presidentin kombëtar e quan “hajdut kombëtar”. /Periskopi
