Është shtyrë shqyrtimi fillestar ndaj Naim Murselit dhe të tjerëve, të akuzuar për vrasjen e Liridona Ademajt.
Kështu vendosi gjyqtarja Fatmire Dermaku, në mungesë të shkresave të lëndës për palët e akuzuara.
Seanca fillestare është shtyrë për 31 janar, në orën 11:00.
“Nuk mund të vazhdojmë me këtë shqyrtim fillestar, pasi dëmtohet mbrojtja e të pandehureve Ndrecë Dodaj dhe Agron Kuqi, avokat kjo tregon joseriozitetin tuaj për mbrojtje dhe kjo është hera e fundit që unë shtyjë shqyrtimin për shkak të moskryerjes së punës suaj për çka jeni të angazhuar. Seanca shtyhet për 31 janar ora 11:00”, tha gjyqtarja.
Gjyqtarja Dermaku e ka dënuar me 500 euro gjobë avokatin e Kushtrim Kokallaj, Ndrecë Dodaj, për mos përfillje të gjyqtares. Avokatit paraprakisht ju ka shqiptu një vërejtje me shkrim për pengim të gjyqtares.
Para turpit gjykues është deklaruar Naim Murseli i cili akuzohet për vrasjen e bashkëshortes së tij.
Ai u shpreh se është shtetas i Kosovës dhe Suedisë dhe se është i ve pasi që i është vrarë gruaja.
“Jam shtetas i Kosovës dhe Suedisë. Nuk jam i martuar pasi që e kam gruan të vrarë. Gjendja ekonomike e mesme”, tha Murseli.
Avokati Ndrecë Dodaj, që mbron Kushtrim Kokallën, deklaroi në fillim të seancës se nuk i ka pranuar në tërësi shkresat e lëndës, duke thënë që nuk mundet me këshillu klientin e tij e as me kundërshtu aktakuzën.
Edhe avokati Agron Kuqi që mbon të akuzuarin Tom Dodaj, deklaroi se nuk janë në gjendje që sot të deklarohen lidhur me rastin.
Prokuroria Themelore në Prishtinë më 15 janar 2025 ka ngritur aktakuzë ndaj katër të akuzuarve.
Në aktakuzën e Prokurorisë, thuhet se Murseli, Plava dhe Kokalla ishin dakorduar paraprakisht që vrasja të kryhej nga i akuzuari Plava me marrëveshje që Murseli t’ia paguante atij 30 mijë euro.
I gjithë plani për vrasjen e Liridonës, thuhet se u bë nga bashkëshorti i saj, tani i akuzuari Naim Murseli, si pasojë e çrregullimit të raporteve familjare e martesore, ku edhe lindi dëshira e tij për hakmarrje.
