Presidenti i Serbisë Aleksandër Vuçiç, sipas mediave serbe ka nënshkruar një urdhër për ngritjen e gatishmërisë së forcave të armatosura të Serbisë në nivelin më të lartë dhe i urdhëron të lëvizin urgjentisht te vija administrative me Kosovën.
Mediat serbe thonë ai vendosi për këtë vendim për shkak të dhunës që sipas tij, po ushtron policia e Albin Kurtit ndaj serbëve në Zveçan.
Sipas mediave serbe, Vuçiç gjithashtu i kërkoi NATO-s që urgjentisht të ndalojë dhunën kundër serbëve.
Gjatë ditës, Policia e Kosovës ka njoftuar se po asiston kryetarët e zgjedhur për të hyrë në objektet komunale.
Kryetari i Zveçanit, ai i Leposaviqit dhe kryetari i Zubin Potokut, të dalë nga zgjedhjet e 23 prillit, kanë kryer betimin të enjten. Asnjëri prej tyre nuk është betuar në objektin e komunës përkatëse, përveç kryetarit të veriut të Mitrovicës.
Zgjedhjet në veri janë bojkotuar nga partia më e madhe e serbëve në Kosovë, Lista Serbe, me mbështetjen e Beogradit zyrtar.
Kryetarët paraprakë nga kjo parti, kishin dhënë dorëheqje nëntorin e vitit të kaluar.
Ata u larguan nga institucionet në shenjë pakënaqësie me vendimin e Qeverisë së Kosovës që obligonte qytetarët t’i kthejnë targat e veturave nga ilegale në ato të Republikës së Kosovës.
