Gazetare: Linda Ebibi
Për tre muaj Arben Taravari mbush një vit që udhëheq me Ministrinë e Shëndetësisë. Që nga marrja e këtij posti, Taravarin e ndoqën disa ngjarje, të cilat kanë pasur reagime të shumta në opinion.
Në fillim të mandatit të tij ai u përball me problemin e kompresorëve të oksigjenit në Qendrën Klinike “Nënë Tereza”, të cilët për disa muaj të tërë nuk funksionuan. Kompresorët ndaluan së punuari për shkak të një ere të pakëndshme që u përhap përmes sistemit të ventilimit dhe problemit me furnizimin e oksigjenit, me çka u anuluan disa operacione.
Një ngjarje tjetër që gjithashtu ngriti shqetësime në opinion ishin vdekjet e foshnjave. Për rreth 7 muaj u regjistruan 19 vdekje, shumica e tyre ishin të sapolindur ndërsa njëri prej tyre ishte 5 vjeç.
Vdekja e foshnjës 14 muajshe Ryja Sulisi ndezi alarmin, e cila humbi jetën më 5 tetor të vitit të kaluar. Më pas një muaj më vonë humbi jetën një fëmijë në moshën 5 vjeçare. Në nëntor të vitit të kaluar gjithashtu u regjistrua një vdekje e foshnjës të porsa lindur 8 ditore dhe një foshnje 4 mujore nga Struga. Në fillim të muajit dhjetor, më konkretisht më 6 dhjetor humbi jetën një foshnje 10 mujore. Ndërsa më 15 dhjetor humbi jetën një foshnje shtatë muajshe.
Ngjarja që karakterizoi nisjen e këtij viti në shëndetësi ishte mungesa e terapisë biologjike në Klinikën e Onkologjisë për pacientët me kancer. Pacientët kishin mungesë të gjashtë terapive biologjike, ndërsa furnizimi i terapisë shtyhej nga java në javë.
Për të rikujtuar, Taravari para se të bëhej ministër i Shëndetësisë, pati premtuar zbardhjen e skandalit të Onkologjisë, ku terapitë patën përfunduar në tregun e zi. Por, me tu ulur në kolltukun e të kreut të shëndetësisë, Taravari ndryshoi qëndrimin duke thënë se kjo është punë e organeve gjyqësore.
Premtimi për ndërtimin e parkingut në Qendrën Klinike përsëri nuk gjeti zgjidhje, të paktën deri më tani nuk ka asnjë tender për një gjë të tillë. Taravari disa herë pati premtuar se së shpejti kjo problematike shumëvjeçare do të gjente zgjidhje, por e njëjta nuk ka ndodhur. Tentoi të lidhte një kontratë me një kompani nga Shqipëria, por kryeministri Mickoski ia ndaloi si pasojë e reagimit qytetarë dhe dyshimeve për korrupsion.
Në rastin e tragjedisë së Koçanit, sistemi shëndetësor u gjet në kolaps edhe për shërbimet optimale, e lërë më për ato më adekuate për çka u desh solidarizimi i shteteve nga rajoni dhe bota. Nga 200 të lënduar, rreth 150 prej tyre gjetën kurim jashtë vendit.
Taravari po mbush një vit mandat pa realizuar edhe 1.200 punësimet e premtuara ku përfshihen specializantë dhe personel mjekësor. Për to kishte premtuar vendime pune por një gjë të tillë, akoma nuk e ka bërë. /Alsat.mk
