Kombëtarja e Shqipërisë do të mësojë sonte grupin dhe kundërshtarët e Kampionatit Evropian “Euro 2024”.
Në Hamburg prej orës 18:00 do të hidhet shorti për grupet. Skuadrat janë të ndara na katër vazo dhe Shqipëria ndodhet në vazon e dytë së bashku me Hungarinë, Turqinë, Rumaninë, Danimarkën dhe Austrinë.
Gjermania si nikoqire e Evropianit ndodhet në vazon e parë dhe ekipet e tjera në atë vazo janë Portugalia, Franca, Spanja, Belgjika dhe Anglia.
Në vazon e tretë ndodhen Holanda, Skocia, Kroacia, Sllovenia, Sllovakia dhe Çekia.
Ndërsa vazo e katërt ende nuk është e plotësuar, pasi deri më tani janë të konfirmuar vetëm tre ekipe Italia, Serbia dhe Zvicra. Tre ekipet e tjera do të përcaktohen nëpërmjet fazës së “Play-Offit”, ku bëjnë pjesë 12 skuadra bazuar në performacën e tyre në Ligën e Kombeve.
Skuadrat janë të ndara në tre grupe (A, B dhe C) dhe do të luajnë shanset e tyre në marsin e vitit 2024. Tre fitueset e grupit do të plotësojnë edhe vazon e katërt.
Kampionati Evropian “Euro 2024” do të nisë më 14 qershor dhe do të ulë siparin me finalen e madhe më 14 korrik.
