Pas njoftimit të SPAK-ut e cila deklaronte se Olsi Rama, nuk ka qenë i implikuar në laboratorin e Xibrakës, ka reaguar dhe kryetari i Grupit Parlamentar të PD-së, Gazment Bardhi, i cili ka qenë personi që ka denoncuar vëllain e kryeministrit pranë Prokurorisë së Posaçme.
Përmes një video të postuar prej Bardhit në rrjete sociale, demokrati e cilësoi njoftimin e SPAK-ut si qesharak, pasi siç shprehet ai, fjalia e parë me atë të fundit të reagimit të Prokurorisë së Posaçme nuk përputheshin.
“Të jem i sinqertë, nuk u besova dot syve me atë që lexova. Hetimet kanë përfunduar, por nuk kanë përfunduar. Ky ishte thelbi atij njoftimi, në fakt qesharak, të cilin e kam paralajmëruar që ditën e parë kur kam denoncuar me fakte dhe të dhëna konkrete, dyshimin e arsyeshëm për përfshirjen e mundshme të vëllait të kryeministrit, Olsi Rama, në çështjen e laboratorit Xibraka. Prokuroria njoftonte se kishte përfunduar hetimet për dosjen 88 të vitit 2024, në fjalinë e parë. por, në fjalinë e pestë, të një njoftimi me 5 fjali, thoshte se kanë pezulluar hetimet dhe kanë ridërguar apo dërguar, që Policia e Shtetit, pra dosjen e plotë, që Policia e Shtetit të bëjë përpjekje për të identifikuar, atë që fshehu para 10 vitesh.”, tha ai.
Sipas Bardhit, SPAK-u nuk ka kryer asnjë hetim apo veprim hetimor ndaj denoncimit të tij për çështjen Xibraka, teksa shton se është përdorur logjika e para 10 viteve në çështje.
“E vërteta në fakt është krejt ndryshe. Prokuroria as ka hetuar, as ka kryer asnjë veprim hetimor për të zbuluar të vërtetën. Prokuroria, që vë dorën në zjarr, që Olsi Rama, nuk është i përfshirë në aktivitet kriminal, deklaron vetë se e ka të pamundur për të identifikuar se kush janë personat e përfshirë, por deri tashmë të paidentifikuar. Njoftimi se njëri nuk është, por ne nuk e dimë se kush janë, në fakt është fiks logjika që përdori përpara 10 vitesh Policia e Shtetit, duke na thënë se kishte arritur të identifikonte moshën e personit, konkrete, 45 vjeç, por nuk i gjente dot emrin.”, tha Bardhi.
Më tej, demokrati pyet Prokurorin e Posaçëm të çështjes nëse ka pyetur apo jo ministrin e Brendshëm të vitit të kaluar, Taulant Ballën, pasi u shpreh se “në seancën plenare të datës 4 prill të vitit 2024, ministri i brendshëm i kohës, Taulant Balla, zyrtarisht në seancë plenare, deklaronte, informonte Kuvendin e Shqipërisë, se ai kishte dijeni, se kush ishte identiteti, të moshës 45 vjeç. ”
“Unë sot do ndalem vetëm në një fakt, në seancën plenare të datës 4 prill të vitit 2024, ministri i brendshëm i kohës, Taulant Balla, zyrtarisht në seancë plenare, deklaronte, informonte Kuvendin e Shqipërisë, se ai kishte dijeni, se kush ishte identiteti, të moshës 45 vjeç. Me zë dhe me figurë.
Pyetja ime për prokurorin Shehu është: A e ka thirrur Taulant Ballën, për ta pyetur, për informacionin si ministër i brendshëm, i përcolli, Kuvendit të Shqipërisë, që e njihte personin e moshës 45 vjeç, dhe se nuk kishte asnjë lidhje me PS apo Edi Ramën, por kishte lidhje me PD?
Mjafton vetëm ky fakt, vetëm ky, për të treguar që nuk ka patur asnjë hetim. Nuk ka patur asnjë veprim hetimor konkret për të zbardhur të vërtetën. Ka pasur vetëm një tentativë, për të bërë shqiptarët për budallenj, sikur po hetohet, dhe për të dalë sot me atë njoftim qesharak.”, deklaron Bardhi.
DEKLARATA E SPAK
Prokuroria e Posaçme ka pezulluar hetimet për dosjen “Xibraka” dhe ka njoftuar se Olsi Rama, vëllai i kryeministrit Edi Rama, nuk është i implikuar në këtë çështje.
SPAK argumenton se nuk janë gjendur prova të përfshirjes së Ramës në aktivitetin kriminal të prodhimit apo trafikimit të lëndëve narkotike.
Pezullimi i hetimeve sipas nenit 326 të Kodit Procedural Penal ndodh kur janë kryer të gjitha veprimet e mundshme nga ana e prokurorëve, si dhe kur nuk janë identifikuar autorët e veprave penale.
Prokuroria e Posaçme kundër Korrupsionit dhe Krimit të Organizuar ka përfunduar hetimet për procedimin penal nr. 88 të vitit 2024, të regjistruar pas rifillimit të hetimeve të pezulluara të procedimit penal nr. 335/1 të vitit 2016. Ky procedim lidhej me veprat penale të “Prodhimit dhe shitjes së narkotikëve”, “Trafikimit të narkotikëve”, dhe “Kryerjes së veprave penale nga grupet e strukturuara kriminale”, të parashikuara në nenet përkatëse të Kodit Penal.
Hetimet rifilluan pas administrimit të një informacioni të dërguar nga deputeti Gazment Bardhi, i cili pretendoi përfshirjen e shtetasit, Ols Rama në veprimtari të paligjshme. Në kuadër të këtyre hetimeve, SPAK ka kryer një sërë veprimesh hetimore, përfshirë bashkëpunimin me autoritetet kompetente të Kosovës.
Nga hetimet ka rezultuar se nuk ekzistojnë prova apo fakte që të lidhin shtetasin Ols Rama me aktivitetin kriminal, për të cilin janë dënuar më parë disa individë. Gjithashtu, nuk janë identifikuar autorë të tjerë të mundshëm për veprat penale në fjalë.
Në përputhje me nenin 326 të Kodit të Procedurës Penale, më datë 23 dhjetor 2024, është vendosur pezullimi i hetimeve për procedimin penal nr. 88 të vitit 2024, pasi autorët e tjerë të veprave penale nuk janë identifikuar. Dosja i është dërguar Drejtorisë së Përgjithshme të Policisë së Shtetit për të vijuar përpjekjet për identifikimin e autorëve
