Janë dhjetëra marrëveshje për subvencione dhe investime kapitale, që zëvendësministri i Administrimit të Pushtetit Lokal, Bajram Gecaj i ka nënshkruar me komunat dhe OJQ-të.
Vënia e firmave dhe shtrëngimi i duarve me zyrtarët e komunave dhe OJQ-ve, u bënë në dy ditë të vetme në mes të muajit prill, thonë burime të KTV-së.
Por edhe pas 1 muaji, postat elektronike të mediave, vazhdojnë të bombardohen nga komunikatat e ministrisë për gjoja nënshkrimin e marrëveshjeve të reja.
Kjo dëshmohet edhe në këtë thirrje drejtuar njërës nga OJQ-të, që ka datën 18 prill, por që lajmi për të u publikua në javën e parë të majit.
KTV-ja ka kërkuar sqarim nga Ministria e Pushtetit Lokal se kur në të vërtetë u nënshkruan këto marrëveshje.
Por përgjigjet e ministrisë kanë qenë të përgjithësuara. Bazuar në atë që thotë Ministria, zëvendësministri Gecaj ka vazhduar të nënshkruajë marrëveshje edhe pasi ra qeveria me mocion mosbesimi.
Burime nga kjo ministri i kanë thënë KTV-së që vetë zv.ministri Gecaj kishte insistuar që marrëveshjet e nënshkruar në dy ditë të prezantohen në publik një nga një, në mënyrë që të mbeten aktivë në media.
