Barça vazhdon të punojë pa pushim për të siguruar që Dani Olmo dhe Pau Víctor të mund të vazhdojnë të luajnë nën mbrojtjen ligjore të LaLiga dhe RFEF.
Të martën e kaluar, klubi nuk arriti të paraqiste në kohë gjithë dokumentacionin e kërkuar nga organi drejtues për të mbajtur aktive kartelat e të dy lojtarëve: mungonte konfirmimi bankar që vërtetonte se klubi kishte transferuar tashmë shumën e parave nga shitja e lozhave VIP.
Për këtë arsye, organi i drejtuar nga Tebas i çregjistroi të dy futbollistët. Zgjidhja e këtij problemi u bë një çështje e besimit, pasi LaLiga e konsideroi situatën të mbyllur zyrtarisht, ndërsa klubi, jozyrtarisht, pretendonte se kishte tre ditë kohë për të rregulluar situatën. Zyrtarisht, nëpërmjet një komunikate, klubi njoftoi se do të përpiqej ta zgjidhte çështjen nëpërmjet RFEF.
Gjithsesi, Barça i ka dërguar LaLiga-s gjithë dokumentacionin e kërkuar përpara përfundimit të vitit (me vonesë) dhe tani është në duart e përgjegjësve të tyre. Shuma e shitjes është 120 milionë euro.
Siç theksohej në deklaratën e klubit blaugrana të publikuar pas orës 20:00 të së martës, 31 dhjetor: “FC Barcelona njofton se ka kërkuar një licencë të re nga Federata Spanjolle e Futbollit (RFEF) për lojtarët Daniel Olmo dhe Pau Víctor.” Kjo është e vetmja rrugë që klubi po ndjek për momentin.
Aktualisht, emrat e Dani Olmo dhe Pau Víctor vazhdojnë të shfaqen në faqen zyrtare të RFEF, megjithatë pa miratimin e nevojshëm të LaLiga-s për t’u përdorur në kompeticione.
Barça do të kërkojë që, tani që ka dorëzuar të gjithë dokumentacionin e nevojshëm, organi federativ të japë dritën jeshile që të dy lojtarët të mund të luajnë të shtunën e ardhshme në Barbatro për Kupën e Mbretit, turne i organizuar nga ky institucion.
Që nga 16 dhjetori, ky organ ka si nënkryetar edhe presidentin e LaLiga-s, Javier Tebas. Në klubin e drejtuar nga Laporta ka një farë skepticizmi të brendshëm nëse përgjigja do të jetë pozitive.
