Gazetare: Meihate Rustemi
Era e fortë dhe reshjet e shiut disa minutëshe shkaktuan dëme të mëdha në Shkup. Përveç “liqeneve” të improvizuara thuajse në çdo lagje, shumë pemë u rrëzuan në tokë. Disa prej pemëve madje përfunduan mbi makina të ndryshme duke i dëmtuar mjaft.
Një pamje më trishtuese ishte në ish rrugën “Krimska” në Komunën e Çairit, ku si pasojë e erës së fortë ishte shkulur një kulm i shtëpisë që me vete kishte tërhequr edhe kabllot e energjisë elektrike.
Banorët që jetojnë në këtë rrugë shprehen të revoltuar për gjendjen e krijuar. Siç thonë ata, fatkeqësitë natyrore nuk mund të ndalohen por mungojnë punimet e duhura infrastrukturore në këtë rrugë dhe shumë të tjera.
Nga stuhia e shkurtër që përfshiu Shkupin, dëme ka pësuar edhe një pjesë e kulmit të Spitalit gjinekologjik “Nënë Tereza” në Çair. Dëme materiale nga reshjet, edhe në qytete të tjera të vendit.
