Qarkullimi në të gjitha rrugët nacionale dhe rajonale pas reshjeve të borës, po përmirësohet. Të gjitha llojet e automjeteve po qarkullojnë pa ndonjë pengesë.
Ministria e Infrastrukturës thotë se ekipet e saj janë në teren duke monitoruar dhe vazhduar punën me kompanitë e kontraktuara në mirëmbajtjen e rrugëve, në mënyrë që komunikacioni të zhvillohet normalisht.
Po ashtu, ekipet e MI-së janë duke iu dalë në ndihmë ekipeve lokale në disa komuna të Kosovës për të zhbllokuar disa rrugë në zona të thella malore, thuhet në komunikatën për media të Ministrisë së Infrastrukturës.
Në rrugën rajonale Brezovicë – Qendra e Skijimit është duke u punuar për zhbllokimin e saj.
Ministria e Infrastrukturës i këshillon qytetarët që të respektojnë rregullat e komunikacionit të përcaktuara me Ligj dhe të jenë të kompletuar me pajisjet dimërore.
