Pa kaluar as 24 orë nga ngjarja e rëndë që ndodhi mbrëmë në qytetin e Pejës, ku si pasojë e të shtënave me armë zjarri mbetën të plagosur tre persona – babai dhe dy djemtë e tij – Policia ka arritur që të arrestojë dy personat që dyshohet të jenë të përfshirë në rast.
I dyshuari kryesor, Agron Gashi dhe një tjetër person që dyshohet se i ndihmoi të riut të kryente veprën e rëndë, fillimisht u arratisën nga vendi i ngjarjes.
Por Policia në koordinim me Prokurorinë ka arritur që shumë shpejt të lokalizojë vendndodhjen e tyre dhe të njëjtit tashmë ndodhen në masën e ndalimit policor, raporton Gazeta Online Reporteri.net.
Në mesin e të plagosurve është edhe një pjesëtar i Forcës së Sigurisë së Kosovës.
Nga FSK-ja kanë konfirmuar për Gazetën Online Reporteri.net se i plagosuri J.B. është pjesëtar i tyre.
“E konfirmojmë se personi në fjalë është pjesëtar i FSK-së”, thuhet në përgjigjen e tyre për Reporteri.net.
Shefi i Mjekimit Intensiv në QKUK, Shaqir Uka, i tha Gazetës Online Reporteri.net se gjendja shëndetësore e sidomos njërit prej të lënduarve, vazhdon të jetë e rëndë, pavarësisht përpjekjeve të stafit mjekësor për ta stabilizuar gjendjen e tij.
E, armën që trazoi qytetin e Pejës dhe gjithë vendin, dyshohet se e shkrepi 21-vjeçari, Agron Gashi.
Përmes një komunikate për media, Policia e Kosovës ka njoftuar se Gashi është shoqëruar në stacion policor, ku është intervistuar nga organet e hetuesisë lidhur me rastin.
Përveç Gashit, në pranga fillimisht ka rënë edhe një person që dyshohet se i ndihmoi 21-vjeçarit të kryejë veprën.
Prokurori i rastit, Ersan Qavolli, në një prononcim për Gazetën Online Reporteri.net tha se Gashi dhe i dyshuari tjetër janë ndaluar për 48 orë dhe brenda afatit ligjor Prokuroria do të parashtrojë kërkesë për caktimin e masës së paraburgimit.
Qavolli nuk foli për motivet që mund të kenë çuar deri në ngjarjen e rëndë, për shkak se hetimet janë ende në fazën fillestare.
