Izraeli ka shkelur të gjitha rregullat e luftës në Rripin e Gazës, tha të dielën komisioneri i përgjithshëm i agjencisë së OKB-së për refugjatët palestinezë (UNRWA), Philippe Lazzarini, transmeton Anadolu.
Ai theksoi shkeljet e vazhdueshme në enklavën palestineze, ku Izraeli ka vazhduar sulmet e tij për 14 muajt e fundit.
“Përshkallëzim gjatë 24 orëve të fundit. Më shumë civilë raportohen të vrarë dhe të plagosur”, tha ai në një postim në llogarinë e tij në X.
“Sulmet në shkolla dhe spitale kanë qenë të zakonshme. Bota nuk duhet të mbetet e palëvizshme. Të gjitha luftërat kanë rregulla. Të gjitha këto rregulla janë thyer”, tha ai.
Lazzarini tha se një armëpushim në Rripin e Gazës është “i vonuar shumë”, duke bërë thirrje për ndalimin e sulmeve për të mbrojtur civilët.
Izraeli nisi luftë gjenocidale në Rripin e Gazës më 7 tetor 2023, duke vrarë më shumë se 45.200 palestinezë, kryesisht gra dhe fëmijë.
Gjykata Ndërkombëtare Penale (GJNP) lëshoi urdhra arresti muajin e kaluar për kryeministrin izraelit Benjamin Netanyahu dhe ish-ministrin e tij të mbrojtjes Yoav Gallant për krime lufte dhe krime kundër njerëzimit në enklavë.
Izraeli gjithashtu përballet me një çështje gjenocidi në Gjykatën Ndërkombëtare të Drejtësisë (GJND) për luftën e tij kundër Gazës.
