Drejtoria e Përgjithshme e Burgjeve ka reaguar pas vdekjes së Andrea Bregasi, i cili arriti të vuajë vetëm 9 ditë burg, pasi ndërroi jetë në spitalin e Fushë-Krujës për shkak të atakut kardiak, ditën e sotme (20 korrik).
Përmes një deklarate për media, Drejtoria sqaron se 33 vjeçari ka shfaqur fillimisht shqetësime në ambientet e qelisë ku mbahej i burgosur në Fushë-Krujë, e është dërguar menjëherë në në ambulancë në Qendrën Shëndetësore të Fushë-Krujës.
Siç u deklarua e më parë, Bregasi ishte përdorues i lëndëve narkotike dhe kishte nisur trajtimin me metadon nga stafi i IEVP-ve.
Ky trajtim kishte si qëllim rehabilitimin e 33 vjeçarit e përmirësimin e gjendjes së tij shëndetësore.
Andrea Bregasi ndodhej në statusin e të paraburgosurit.
I riu u arrestua më 11 korrik 2024, pasi më 14 dhjetor 2023 kreu atentat ndaj Rudolf Zefit, duke qëlluar me 6 plumba kundrejt makinës së këtij të fundit, me qëllim eliminimin e tij. Fatmirësisht shënjeshtra e 33 vjeçarit shpëtoi nga ky sulm, duke bërë që atentati të ishte i dështuar për Bregasin.
Një ditë pas arrestimit të tij, Gjykata e Durrësit dha masën e sigurisë “arrest me burg”, për veprën penale “Mbajtja pa leje dhe prodhimi i armëve, armëve shpërthyese dhe i municionit” te parashikuar nga neni 278/1 i Kodit Penal.
Gjykata e Shkallës së Parë së Tiranës, më 14 korrik 2024, e vuri Bregasin përballë akuzave “Vrasje në rrethana të tjera cilësuese”, mbetur në tentativë, dhe “Mbajtja pa leje dhe prodhimi i armëve, armëve shpërthyese dhe i municionit” të parashikuar nga nenet 79 gërma “dh” – 22 dhe neni 278/1 i Kodit Penal.
Deklaratë për media
Data: 20 Korrik 2024
Sot, më datë 20 Korrik 2024, shtetasi Andrea Bregasi, 33 vjeç, ka ndërruar jetë në Qendrën Shëndetësore Fushë Krujë për shkak të një arresti kardiak, në orën 14:32. I paraburgosuri ka shfaqur shqetësime dhe menjëherë rreth orës 14:15 është dërguar në ambulancë në Qendrën Shëndetësore Fushë-Krujë. Shtetasi Bregasi ka qenë përdorues i lëndëve narkotike dhe kishte nisur trajtimin me metadon nga stafi mjekësor i IEVP-ve. Ky trajtim synonte të ndihmonte në rehabilitimin e tij dhe në përmirësimin e gjendjes së tij shëndetësore.Andrea Bregasi është transferuar në IEVP-në Fushë Krujë më datë 12 Korrik 2024.
Shtetasi Andra Bregasi, i biri i Hysen dhe Dhurata, i datëlindjes 09.12.1991, lindur dhe banues në Tiranë. Me gjendje civile beqar, me gjendje gjyqësore i dënuar, me arsim 8 klasë, me kombësi dhe shtetësi shqiptare.
Ky person ndodhet në IEVP Fushë Kruje me statusin e të paraburgosurit.
• Me vendimin 454 datë 12.07.2024 të Gjykatës së Shkallës së Parë të Juridiksionit të Përgjithshëm Durrës është dhene masa e sigurimit “Arrest ne burg”, si i dyshuar për kryerjen e vepres penale “Mbajtja pa leje dhe prodhimi i armëve, armëve shpërthyese dhe i municionit” te parashikuar nga neni 278/1 i Kodit Penal.
• Gjithashtu me vendimin 1779 regj. Them datë 14.07.2024 të Gjykatës së Shkallës së Parë të Juridiksionit të Përgjithshëm Tiranë është vendour vazhdimi i masës së sigurimit personal “Arrest me burg” ndaj personit nën hetim Andrea Hysen Bregasi, me vendimin nr. 14 akti datë 05.01.2024 të Gjykatës së Shkallës së Parë të Juridiksionit të Përgjithshëm Tiranë në të cilën ai akuzohet për kryerjen e veprave penlae “Vrasje në rrethana të tjera cilësuese” të mbetur në tentativë, si dhe “Mbajtja pa leje dhe prodhimi i armëve, armëve shpërthyese dhe i municionit” të parashikuar nga nenet 79 gërma “dh” – 22 dhe neni 278/1 i Kodit Penal.
