Presidenti Ilir Meta ka reaguar pas vendimit të rregullores së re nga Byroja e Kuvendit, i cili nuk lejon gazetarët të ndjekin aktivitetet e kryesisë së Kuvendit nga afër.
Në një postim në facebook, Meta shkruan se ky vendim është i papranueshëm dhe anti-demokratik, ndërsa shton se ky akt kufizon lirinë dhe pavarësinë e medias dhe dëshmon sërish armiqësinë e këtij Kuvendi me lirinë e medias dhe demokracinë në Shqipëri.
“I dënueshëm, i papranueshëm dhe antidemokratik, vendimi i Kuvendit njëpartiak për ndalimin e raportimit të pavarur të gazetarëve dhe zëvendësimin me transmetime zyrtare të kontrolluara.
Ky akt, që vjen në të njëjtën kohë me nxitimin e mazhorancës për uzurpimin në mënyrë të njëanshme dhe vendosjen nën kontroll të plotë të Autoritetit të Mediave Audioviziv, kufizon lirinë dhe pavarësinë e medias, instalon një regjim censure, shkel të drejtat e njeriut dhe dëshmon sërish armiqësinë e këtij Kuvendi monist me lirinë e medias dhe demokracinë në Shqipëri.
Është pikërisht Kuvendi aktual, që në historinë e parlamentarizmit pluralist ka marrë vendimet më skandaloze për shtypjen e fjalës së lirë, përfshi miratimin dhe mostërheqjen prej gati një viti të paketës antikushtetuese “Antishpifje”, në refuzim të hapur të rekomandimeve të Komisionit të Venecias.
Duke mbështetur shqetësimin e drejtë të komunitetit të gazetarëve të pavarur shqiptarë dhe të kolegëve të tyre të huaj, mbi regresin e Shqipërisë në raport me lirinë e medias, i bëj thirrje Kuvendit monist dhe mazhorancës të tërhiqet menjëherë nga këto praktika të ngjashme me regjimin e Lukashenkos, që po dëmtojnë seriozisht integrimin europian të vendit”, shkruan Meta.
Vendimi i miratuar pak ditë më parë edhe nga deputetët që nuk do të jenë më në legjislaturën e ardhshme, parashikon që mediet do e ndjekin aktivitetin e Kuvendit në një zyrë me kompjuterë që transmetohen në kohë reale aktivitetet, por që regjia bëhet nga Kuvendi.
