Lëvizja Vetëvendosje ka mbajtur sot takim mobilizues me aktivistë dhe anëtarë në Podujevë.
Sipas njoftimit për media aty është diskutuar në lidhje me situatën politike në vend, si dhe hapat e mëtutjeshëm të Lëvizjes karshi, siç është thënë, temës së rrezikshme e cila synon cungimin e territorit dhe ndarjen e Kosovës.
Të pranishëm në këtë tubim ishin shefi i grupit parlamentar Glauk Konjufca si dhe deputeti Liburn Aliu. Mysafir ishte edhe anëtari i kryesisë, Ajet Potera.
“Qendra e Lëvizjes Vetëvendosje në Besianë do të vazhdojë me tubime tjera mobilizuese me qytetarët në ditët dhe javët e ardhshme”, thuhet në njoftim.
Kujtojmë se Lëvizja Vetëvendosje, e kishte nisur nga Gjilani turin e tubimeve mobilizuese, për atë që e ka quajtur mbrojtje të sovranitetit dhe kundër ndarjes së Kosovës.
Në Gjilan kishte qenë kryetari Albin Kurti, e përkrah tij deputeti Shemsi Syla dhe asambleistja Arjeta Rexhepi. Tubimin e kishte hapur kryetari i Qendrës së VV-së në Gjilan, Nevzad Isufi “duke akuzuar presidentin Thaçi se është bërë figura më përçarëse në politikë e cila tani po tenton ta përçajë edhe territorin e vendit”.
Sipas njoftimit, në vazhdim, Isufi përmendi problemet e shkaktuara nga decentralizimi në komunën e Anamoravës dhe diskriminimin e vazhdueshëm të shqiptarëve në luginën e Preshevës.
“Edhe një zyrë e hapur për adresimin e problemeve të shqiptarëve të Preshevës, Medvegjës dhe Bujanocit është mbyllur pa shpjegim nga kryetari i komunës Lufti Haziri”, thuhet në njoftim.
Kurti atje kishte thënë se 10 vite pas fillimit të procesit të decentralizimit, i cili e ka gjymtuar Kosovën dhe Anamoravën, do duhej bërë një vlerësim i këtij gjymtimi dhe jo t’i shtohet një lojë e rrezikshme me një aventurë personale të Thaçit, e cila po i shkon përshtat aspiratave shoviniste të Beogradit.
Duke vënë në dijeni qytetarët për vendimin e Kryesisë së Lëvizjes për organizimin e protestave masive dhe koordinimin me LDK-n, Kurti tha se “ka ardhur koha që qytetari i Kosovës të ngrihet në skenën politike, ku është braktisur nga ata që duhet t’ia mbronin dhe përfaqësonin interesat”.
Në vazhdim përsëriti qëndrimin e panegociueshëm të Lëvizjes se presidenti nuk mundet të shkojë në dialog pa parime dhe mandat; se aventurat personale të Thaçit nuk mund të lejohen të bëhen kompromise të dhimbshme për Kosovën; se sa më shumë i rrezikohet karriera Thaçit, aq më shumë e rrezikon ai Kosovën; dhe se ideja e tij për korrigjimin e kufijve ka relativizuar atë që është e parelativizueshme, pavarësinë dhe integritetin e Kosovës.
Kurti e përmblodhi qëndrimin e Lëvizjes duke shpjeguar se bisedimet me Serbinë do të duhej të nisnin me kërkesën për njohjen e pavarësisë, pagimin e reperacioneve për dëmet e luftës dhe garantimin e reciprocitetit të të drejtave. “Çfarë kanë për të drejta serbët në Kosovë duhet t’i kenë edhe shqiptarët në Preshevë, Medvegjë, Bujanoc, por jo vetëm”, u shpreh në mbyllje të fjalës së tij kryetari i Vetëvendosjes.
Vetëvendosje ka paralajmëruar protesta në rrugë për të kundërshtuar Thaçin dhe idenë e tij për korrigjim të kufirit, por ende nuk ka një datë se kur do të mbahen ato. Për këtë protestë thirrje publike i ka bërë edhe Lidhjes Demokratike të Kosovës.
