Politike i ka konsideruar Lëvizja Vetëvendosje vendimet e PZAP-së për rinumërim në Prishtinë dhe Prizren.
Kandidati i kësaj partie dhe kryetari në detyrë i Prishtinës, Shpend Ahmeti, arsyetimet e këtij institucioni i ka quajtur absurde.
Ai tha se qëllimisht nuk është proceduar me numërim të votave nga diaspora dhe atyre me kusht.
Procesi i votimit në rundin e balotazhit në Prizren ka qenë krejt i rregullt dhe rinumërimi është i paarsyeshëm, është shprehur Mytaher Haskuka.
Ndërsa kryetari i Lëvizjes Vetëvendosje vendimet i ka quajtur një tentim grusht shteti kundër vullnetit të qytetarëve.
Në këtë konferencë është bërë e ditur se lidhur me këto vendime të PZAP-së dhe KQZ-së, janë njoftuar edhe përfaqësitë diplomatike në Prishtinë, si dhe janë njoftuar vëzhguesit ndërkombëtarë.
Gjithashtu, është paralajmëruar kallëzim penal ndaj panelit të PZAP-së për vendimet e nxjerra, pasi sipas Ymerit, nuk ka bazë ligjore për to dhe janë fshehur prova.
