Polemikat mes kryeministrit Edi Rama dhe influencerave që kanë mbështetur protestën kundër ndërtimeve në Zvërnec dhe kanë kërkuar dorëheqjen e tij, vijojnë të shkaktojnë reagime në rrjetet sociale.
Së fundmi, influencerja Dea Mishel Hoxha ka publikuar një video ku i përgjigjet deklaratave të Ramës, dhe thotë se shumica e influencereve janë vajza të arsimuara dhe të artikuluara.
Ajo i ka kujtuar atij kabinetin qeveritar dhe konkretisht deputeten Zegjine Çaushi, për të cilën Dea Mishel tha se nuk di as të numërojë.
“Po të lutem, mos bëj ironi me ne, kur ti ke futur në kabinet Zeqinenë, e cila nuk di të numërojë, nuk di të shkruajë shqip pa gabime, nuk di as të përdorë ChatGPT për ta nxjerrë veten nga lluca e saj, sepse nuk di as t’ia thotë emrin.
Pra, në momentin që ti merr këtë vajzë dhe qëndron pas saj, po u jep shembullin vajzave të tjera që, së pari, nuk kanë nevojë të shkojnë në shkollë e të investojnë në dije, sepse mund të jesh krejtësisht injorante dhe të vish në Parlament. Kështu që mos na bëj ironi”, thotë Dea në reagimin e saj.
Më tej, ajo nuk ka kursyer as akuzat ndaj kreut të qeverisë për ironinë dhe komentet seksiste ndaj vajzave që kanë ngritur zërin për çështje publike.
“E para, sa mirë që po flasin influencueset, sepse mediat, çuditërisht, të gjitha po heshtin. Nuk e di, kryeministër, di ti ndonjë arsye, ndonjë shpjegim se pse? Se unë jam budallaqe dhe nuk e kuptoj dot.
E dyta, ti si njohës i arteve të bukura dhe i artistëve duhet ta dish që trupi i femrës është një gjë hyjnore dhe nuk ke pse bën komente të tilla seksiste në vitin 2026. Por, falë Zotit, zoti kryeministër, unë nuk kompleksohem nga burrat që flasin për pamjen time, të paktën jo aq sa për të ndaluar atë që kam ndërmend të them”, shprehet Dea.
@zeri_al Influencerja i përgjigjet Ramës: Ke në Parlament Zeqinenë që nuk di të numërojë dhe merresh me ne⁉️ #zëri #deamichelle #edirama #viral ♬ original sound – ZËRI
Dea Mishel Hoxha: Përshëndetje kryeministër. Unë jam një influencer, kam veshur një fund dhe duhet të bëj si aktiviste. Hajde të flasim pak.
E para, sa mirë që po flasin influencueset, sepse mediat, çuditërisht, të gjitha po heshtin. Nuk e di, kryeministër, di ti ndonjë arsye, ndonjë shpjegim se pse? Se unë jam budallaqe dhe nuk e kuptoj dot.
E dyta, ti si njohës i arteve të bukura dhe i artistëve duhet ta dish që trupi i femrës është një gjë hyjnore dhe nuk ke pse bën komente të tilla seksiste në vitin 2026. Por, falë Zotit, zoti kryeministër, unë nuk kompleksohem nga burrat që flasin për pamjen time, të paktën jo aq sa për të ndaluar atë që kam ndërmend të them.
Po të kthej përgjigje me poza Instagrami që supozohet t’ia ulin vlerën fjalës sime, por po i pyes ndjekësit e mi, ju si mendoni, ka vlerë kjo që do të them tani apo jo?
Unë i njoh shumicën e influencueseve dhe janë goca me shkollë të lartë, të artikuluara, ndryshe nga një pjesë e kabinetit tënd. Dhe nëse do të ketë injorantë, nuk e përjashtoj si mundësi, por ti si kryeministër duhet të shohësh pse po ndodh kjo gjë. Mos ndoshta po vjen nga fakti që vajzat dhe djemtë e rinj nuk kanë asnjë lloj frymëzimi për t’iu përkushtuar shkollës dhe dijes, sepse kanë kuptuar që në këtë vend me ndershmëri dhe me punë nuk ecën përpara?
Po të lutem, mos bëj ironi me ne, kur ti ke futur në kabinet Zeqinenë, e cila nuk di të numërojë, nuk di të shkruajë shqip pa gabime, nuk di as të përdorë ChatGPT për ta nxjerrë veten nga lluca e saj, sepse nuk di as t’ia thotë emrin.
Pra, në momentin që ti merr këtë vajzë dhe qëndron pas saj, po u jep shembullin vajzave të tjera që, së pari, nuk kanë nevojë të shkojnë në shkollë e të investojnë në dije, sepse mund të jesh krejtësisht injorante dhe të vish në Parlament. Kështu që mos na bëj ironi.
Tani shqiptarët për të tilla gjëra janë mërzitur, përveçse për Nartën, edhe për gjëra si kjo që sapo përmenda. Unë, si një influencer në tentativë për të qenë aktiviste, zoti kryeministër, mendoj se duhet ta largosh pak telefonin, ta lësh një ditë, të mendohesh, të qetësohesh dhe të tregohesh lider dhe njeri më i madh në këtë situatë, sepse këta njerëz që janë ngritur në protestë nuk janë militantët e PD-së, të cilëve ti mund t’u kthehesh me ironi, të futesh në debat dhe të duartrokasin. Këta janë populli yt, njerëz intelektualë që janë lodhur vërtet. Të bësh ironi nuk mendoj se të vlen aspak. Po iki tani, se duhet të bëj disa foto me bikini.
