Policia e Vlorës ka reaguar në lidhje me videon e publikuar në rrjete sociale ku një automjet nuk i hap rrugën zjarrfikëses për të shkuar në vendngjarjen e një aksidenti, ku për pasojë humbi jetën një shtetas.
Policia bën me dije se ka mundur të identifikojë drejtuesin e mjetit, i cili është shtetasi F. Rr., 25 vjeç.
Ndaj tij është vendosur një masë administrative gjobë 40000 lekë, si dhe i është bërë heqja e patentës për 24 muaj.
Vlorë/Sqarim
Në lidhje me një video të postuar në rrjetet sociale ku duket një automjet, i cili nuk i hap rrugën zjarrfikëses për të shkuar në një vendngjarje sqarojmë se:
Specialistët e Qarkullimit Rrugor në DVP Vlorë, pas publikimit të videos, në bazë të informacioneve të grumbulluar kanë bërë të mundur identifikimin e shtetasit F. Rr., 25 vjeç, banues në Vlorë, drejtuesi i mjetit që u bë pengesë për mbërritjen e shpejtë të zjarrfikëses në një vendngjarje ( aksident), ku si pasojë humbi jetën një shtetas.
Në përfundim të veprimeve, nga specialistët e Qarkullimit Rrugor u vendos masa administrative 40000 lekë, si dhe pezullimi i lejes së drejtimit për 24 muaji për shtetasin F. Rr.
Drejtoria Vendore e Policisë Vlorës fton qytetarët që të denoncojnë në numrin 112 dhe në Komisariatin Dixhital çdo paligjshmëri duke iu garantuar anonimat të plotë dhe reagim të menjëhershëm dhe të paanshëm.
