VLEN akuzon BDI-në se me praktikat siç thonë të pandershme gjatë 20 viteve të saj në pushtet, ka mbajtur peng shqiptarët me kontrata në vepër për t’i shfrytëzuar dhe manipuluar për vota.
Ky është një shembull i qartë i keqpërdorimit të shqiptarëve dhe i shtytjes për të mbështetur interesa të kësaj partie deri sa ishte në pushtet, duke krijuar një sistem të varësisë që ka dëmtuar zhvillimin dhe mirëqenien e tyre. Këto praktika që BDI ka instaluar gjatë këtyre viteve, janë një plagë e rëndë që ka lënë një pasojë të thellë në shoqërinë shqiptare, thuhet në komunikatën e VLEN-it.
Nga ky koalicion thonë se janë angazhuar për avancimin e ligjit për përfaqësim të drejtë dhe adekuat. Ky ligj është në fazën finale të hartimit dhe do të sjellë një sistem më të drejtë dhe më të barabartë për të gjithë qytetarët pa dallim, duke siguruar që çdo individ të ketë mundësinë të kontribuojë në shoqëri dhe të ketë mundësi të zhvillohet profesionalisht pa pasur frikë se do të manipulohet apo shantazhohet./ Alsat.mk
