Rrethanat e rrëmbimit dhe vrasjes së 23-vjeçarit Renis Dobra, trupi i të cilit u gjet sot në liqenin e Shkopetit, mbeten ende të paqarta.
Policia vijon hetimet, ndërsa sipas gazetarit Enver Doçi, priten shoqërime të tjera për zbardhjen e ngjarjes.
Ndërkohë të enjten një ekip ekspertësh do të mbërrijë nga Tirana për të nxjerrë nga liqeni automjetin e viktimës, që mund të përmbajë prova kyçe për hetimin.
Sipas burimeve për News 24, Dobra ishte kthyer në Shqipëri rreth 6 muaj më parë nga Gjermania dhe, sipas deklarimeve të para të dhëna në polici, ai nuk kishte konflikte të njohura me ndonjë person. Hetimet janë në fazë intensive.
Dinamika e ngjarjes
Sipas burimeve nga grupi hetimor, dyshohet se 23-vjeçari është rrëmbyer dhe më pas vrarë, por shkaku zyrtar i vdekjes pritet të përcaktohet nga ekspertiza mjeko-ligjore.
Gazetari Enver Doçi raportoi se kamerat e sigurisë kanë fiksuar një automjet që shoqëronte makinën e Renis Dobrës nga fshati Zenisht deri në qytetin e Burrelit. Pas kësaj pike nuk ka më kamera sigurie që të ndihmojnë në gjurmimin e lëvizjeve të tij apo të personave të përfshirë.
Trupi i pajetë i të riut u gjet pranë liqenit të Shkopetit, ndërsa ishte babai i tij që denoncoi zhdukjen në polici rreth orës 21:30 të së martës së 8 korrikut, pasi djali nuk ishte kthyer në banesë dhe kishte humbur kontaktet për më shumë se tre orë.
Hetimet janë në vijim e sipër, ndërsa policia po punon për të identifikuar automjetin dhe autorët e dyshuar të kësaj ngjarjeje të rëndë.
